«Everton»ning 71 yoshli muxlisi irqchilikda ayblanib hibsga olindi
APLning 35-turi doirasida bo‘lib o‘tgan «Everton» hamda «Manchester Siti» (3:3) jamoalari o‘rtasidagi uchrashuvda «shaharliklar» hujumchisi Antuan Semenyoga nisbatan irqchi xarakterdagi haqoratlar yo‘llagan 71 yoshli muxlis hibsga olindi. Bu haqda The Times nashri xabar bermoqda.
Manba bergan ma’lumotlarga ko‘ra, ushbu fanat garov evaziga qo‘yib yuborilgan, biroq unga o‘yin kunlari stadionga yaqinlashish taqiqlangan.
Ta’kidlanishicha, uchrashuv yakunlangach, ijtimoiy tarmoqlarda «Manchester Siti» himoyachisi Mark Gexi ham irqchilik hujumlariga uchragan. Bunga futbolchining o‘yin davomida gol bilan yakunlangan xatoga yo‘l qo‘ygani sabab bo‘lgan.
Ushbu bahsdan so‘ng «Everton» 48 ochko bilan Angliya chempionati turnir jadvalining 10-pog‘onasini egallab turibdi. «Manchester Siti» esa 71 ochko bilan ikkinchi o‘rinda bormoqda.
