Эртадан талабалар ўртасидаги турнир бошланади
Ўзбекистон Профессионал футбол лигаси томонидан ҳар йили ўтказилиши одат тусига кириб бораётган талабалар ўртасидаги Coca-Cola Students Cup турнири эртадан старт олади.
Учрашувлар “Жар” стадиони ёнида жойлашган майдонда бўлиб ўтиши режалаштирилган.
Coca-Cola Students Cup мусобақаси формати
Мусобақанинг 1-босқичи олдидан 73 та университет бир саватга жойлаштирилади. Улар орасидан энг омадли 13 таси бирданига кейинги имтиёзга эга бўлади ва 2-босқичга йўл олади (Расм 1).
Қолган 60 та университет ўзаро 30 та жуфтлик ҳосил қилади ва ғолиб жамоалар 2-босқичга йўл олади (Расм 2, 3, 4).
Маглуб бўлган 30 та жамоада 2-босқичга чиқиш имконияти сақланиб қолади. Бунинг учун улар 2 та имкониятдан унумли фойдаланиши керак бўлади.
1-имкониятда маглуб бўлган 30 та жамоа ўзаро 15 та жуфтлик ҳосил қилади ва пенальтилар сериясида ўз омадини синаб кўради. Маглуб бўлган университет мусобақа билан хайрлашади (Расм 5).
2-имкониятда 15 та жамоанинг рўйхатдан ўтган барча 12 нафардан футболчиси дарвоза тўсини ёки устунини нишонга олишга уриниб кўради. Якунда энг яхши натижа қайд этган 3 та жамоа 2-босқич чиптасини қўлга киритади (Расм 6).
Шу тариқа 2-босқичга жами 46 та жамоа йўл олади:
• 13 та имтиёзли университет;
• 30 та ғолиб университет;
• 3 та имконият топган университет.
