Энрике: «Чемпионлар лигасидаги иккинчи ғалабамизни ҳақли равишда қўлга киритдик»
“ПСЖ” бош мураббийи Луис Энрике Чемпионлар лигаси финалида “Арсенал” устидан қозонилган ғалабани (1:1, пен. сериясида 4:3) изоҳлади.
“Бу энг қийин рақиблардан бирига қарши юқори даражадаги финал бўлди. Айниқса, дастлабки 10 дақиқада гол ўтказиб юборганимиздан сўнг жуда қийин бўлди. Уларнинг режаси мукаммал эди, бу бизни қийин аҳволга солиб қўйди”.
“Иккинчи бўлимда биз яхшироқ ўйнай бошладик. “Арсенал”нинг паст ҳимоя блоки, жисмоний қудрати ва аъло даражадаги ҳимоясига қарши ўйнаш жуда қийин. Шундай экан, ўзимиз билан фахрлансак арзийди”.
“Кетма-кет учинчи ғалаба ҳақида ўйлаш мумкин. Биз ўз олдимизга бундай мақсадни қўйганимиздан хурсандмиз, чунки клубимиз ва мухлисларимиз бунга муносиб”.
“Пенальтилар сериясига совуққонлик билан ёндашмоқчи эдик. Бу қийин ўйин бўлди. Биз стандарт вазиятлар бўйича Европанинг энг кучли жамоасига қарши ўйнадик, аммо менимча, биз устунлик қила олдик. Биз совринни, Чемпионлар лигасидаги иккинчи ғалабамизни ҳақли равишда қўлга киритдик”.
“Ақлбовар қилмас натижа, биз қилган ишни амалга ошириш жуда қийин. Биз мухлисларимиз ва клубимизни қўллаб-қувватлайдиган барча билан жуда фахрланамиз. Биз жуда бахтлимиз, энди байрам қилса бўлади”, — деди Луис Энрике.
