Элдор Шомуродов: Замонавий футболда ҳаммасига тайёр туриш керак, ҳимояда ҳам ҳужумда ҳам бир хил ҳаракат қилиш лозим
Миср - Ўзбекистон 0:2 ўйинидан кейин Элдор Шомуродов фикр билдирди.
" Биринчи бўлим катта устунлик биз томонда бўлди. Иккитадан кўп гол урсак ҳам бўлар эди. Етарлича вазиятларга эга бўлдик. Дастлабки таймни ютганимиздан кейин, иккинчисида кўпроқ ҳимояга эътибор қаратдик. Рақиб ҳам тактикасига ўзгартиш киритди. Шунинг учун ҳам бошида сал ташаббусни Мисрга бериб қўйдик. Асосийси гол ўтказмадик.
Вазиятларни голга айлантиришда хато бўлди деб ўйлайман. Энг асосийси вазиятларни яратиш. Буни уддаладик. Бу эса Остон Ўрунов билан ҳам ва бошқалар билан ҳам бир-биримизни яхши тушуниб ҳаракатланаётганимиздан дарак беради деб ўйлайман.
Прессинг қилишга ҳаракат қилдик, лекин ҳар хил ўйин бўлади. Айтганимдек биринчи бўлимни прессинг билан ташаббусни ўз қўлимизга олиб ҳаракат қилдик, лекин иккинчи бўлимда кўпроқ ҳимояга эътибор қаратдик. Замонавий футболда ҳаммасига тайёр туриш керак, ҳимояда ҳам ҳужумда ҳам бир хил ҳаракат қилиш керак. Чунки баъзи бир ўйинларда прессинг қилиб ўйнашга тўғри келса, баъзиларда рақибдан келиб чиқиб ҳимояда ўйнашга тўғри келади",-деди Ўзбекистон миллий жамоаси сардори.
