Элдор Шомуродов МЛСга йўл олиши мумкин
Ўзбекистон терма жамоаси сардори Элдор Шомуродов фаолиятини АҚШда давом эттириши мумкин. МЛС вакили “Сент-Луис Сити” “Истанбул Башакшехир” ҳужумчисини ўз сафига қўшиб олишга қизиқиш билдирмоқда.
Туркиялик журналист Ўғуз Оруч маълумотига кўра, Америка клуби 31 ёшли ўзбекистонлик ҳужумчини трансфер қилишни истамоқда. Ҳозирча “Сент-Луис Сити” ва “Башакшехир” ўртасида келишувга эришилгани ёки расмий таклиф юборилгани ҳақида маълумот йўқ.
Шомуродов ўтган мавсум Туркия Суперлигада 34 та учрашувда майдонга тушиб, 22 та гол урди ва 5 та голли узатма амалга оширди. У 22 та гол билан “Трабзонспор” ҳужумчиси Пол Онуачу қаторида чемпионатнинг энг яхши тўпурарларидан бири бўлди.
Маълумот учун, Шомуродов 2025/26-йилги мавсумни “Башакшехир”да ижара асосида ўтказганидан сўнг, 2026-йил ёзида клуб сафига тўлақонли қўшилди. Ўзбекистонлик ҳужумчининг Истанбул клуби билан шартномаси 2028-йил 30-июнгача амал қилади.
