Элдор Шомуродов фаолиятидаги энг катта хатосини айтди
Ўзбекистон терма жамоаси ҳужумчиси Элдор Шомуродов “Рома”даги қийин дамлар, психологик босим ва фаолиятида йўл қўйган асосий хатоси ҳақида очиқ гапирди.
— “Рома”га келганимда жамоада Эдин Жеко бор эди. У каттароқ ёшда, мен эса ўзимни кўпроқ имконият оламан деб ўйлагандим. Аммо тез орада Жеко кетди ва мен ягона ҳужумчи бўлиб қолдим. Кейин Тэмми Абраҳам ҳақида миш-мишлар чиқди. Газеталарда у асосий таркибдан жой олади, деб ёза бошлашди. Бошида ишонмасликка ҳаракат қилдим, лекин бу фикрлар мени ич-ичимдан ея бошлади”, — деди Элдор.
Унинг таъкидлашича, вазиятга нотўғри муносабат билдириши асосий хатога айланган.
— “Ростов” ёки “Женоа”да захирадан майдонга тушсам ҳам ҳар дақиқада курашардим. “Рома”да эса айбдор излашни бошладим, руҳий курашни йўқотдим. Бу эса менинг энг катта хатойим бўлди. Асосийси — ҳар қандай ҳолатда ҳам жангчи руҳиятини сақлаб қолиш керак эди”, — дея қўшимча қилди ҳужумчи.
Ҳозирда Элдор ўтмишдан хулоса чиқарган ва ҳар бир имкониятдан фойдаланиш кераклигини англаган. Унинг тарихини ёш футболчилар учун ибрат сифатида кўриш мумкин — катта футболда муваффақиятга етишиш учун ўзига ишониш ва сабр-тоқат жуда муҳим.
