ЕЛ. \"Манчестер Юнайтед\" \"Атлетик\"ни ер тишлатди!
Европа лигасининг ярим финал жавоб учрашувлари доирасидаги “Манчестер Юнайтед”-"Атлетик Бильбао" қарши тўқнашуви бўлиб ўтди.
“Қизил иблислар” меҳмонда 0:3 ҳисобида ғалаба қозониб, бир оёғи билан финалда турар эди. Иккинчи ўйинда ҳам Аморим шогирдлари рақибни аямади.
Баҳснинг 31-дақиқасида “Атлетик” футболчиси Микел Жаурегисар узоқ масофадан жуда чиройли тарзда кучли зарба билан ҳисобни очди. Жамоалар 0:1 ҳисобида танаффусга йўл олишди.
Иккинчи бўлимда “Юнайтед” янада кўпроқ иштиёқ билан майдонда ҳаракат қилди. Ўйиннинг 72-дақиқасида Маунт ҳисобни тенглаштирди. 1:1.
Орадан 7 дақиқа ўтиб, Магуайр томонидан ошириб берилган тўпни Каземиро боши билан дарвозага аниқ йўллаш орқали инглизларни олдинга ўтиб олишига сабабчи бўлди, 2:1.
85-дақиқада Диалло испанлар жарима майдони ичида, “Атлетик” ҳимоячиси оёқлари орасидан ўтказиб маҳорати билан пас берди ва бу вазиятдан Ҳойлунд унумли фойдаланди, 3:1.
Асосий дақиқага қўшиб берилган биринчи дақиқада Маунт томонидан киритилган иккинчи гол “Юнайтед”нинг собиқ юлдузи Дэвид Бекхэм томонидан майдон марказидан киритилган ўша машҳур голга ўхшади, 4:1.
Шу тариқа “Манчестер Юнайтед” икки ўйин натижасига кўра умумий 7:1 ҳисобида Вальверде шогирдларини мағлубиятга учратиб, финал йўлланмасини қўлга киритди.
