Эдин Жеко қишки трансферлар вақтида «Фиорентина»ни тарк этиши мумкин — Романо
Босниялик ҳужумчи Эдин Жеко яқинлашиб келаётган қишки трансфер ойнасида «Фиорентина»ни тарк этиши мумкин. Бу ҳақда инсайдер Фабрицио Романо хабар бермоқда.
А Серияда сўнгги ўринда бораётган «Фиорентина» таркибни янгилаш режасини аллақачон бошлаган. Жамоа сўнгги олти учрашувда тўртта мағлубиятга учраб, икки марта дуранг ўйнаган.
Эслатиб ўтамиз, Жеко ёзда «Фенербахче»дан Флоренцияга кўчиб келганди. 39 ёшли ҳужумчи 2026 йил 30 июнгача мўлжалланган бир йиллик шартнома имзолаган, унда 2027 йил 30 июнгача автоматик узайтириш банди ҳам мавжуд — у маълум шартлар бажарилганда кучга киради.
Маълумот учун, Жеко жорий мавсумда «Фиорентина» сафида 15 та ўйинда майдонга тушиб, икки марта гол урди. Transfermarkt маълумотига кўра, унинг бозор қиймати 1,6 млн евро этиб баҳоланган.
