Edin Jeko qishki transferlar vaqtida «Fiorentina»ni tark etishi mumkin — Romano
Bosniyalik hujumchi Edin Jeko yaqinlashib kelayotgan qishki transfer oynasida «Fiorentina»ni tark etishi mumkin. Bu haqda insayder Fabritsio Romano xabar bermoqda.
A Seriyada so‘nggi o‘rinda borayotgan «Fiorentina» tarkibni yangilash rejasini allaqachon boshlagan. Jamoa so‘nggi olti uchrashuvda to‘rtta mag‘lubiyatga uchrab, ikki bor durang o‘ynagan.
Eslatib oʻtamiz, Jeko yozda «Fenerbahche»dan Florensiyaga ko‘chib kelgandi. 39 yoshli hujumchi 2026 yil 30 iyungacha mo‘ljallangan bir yillik shartnoma imzolagan, unda 2027 yil 30 iyungacha avtomatik uzaytirish bandi ham mavjud — u ma’lum shartlar bajarilganda kuchga kiradi.
Maʼlumot uchun, Jeko joriy mavsumda «Fiorentina» safida 15 ta o‘yinda maydonga tushib, ikki bor gol urdi. Transfermarkt ma’lumotiga ko‘ra, uning bozor qiymati 1,6 mln yevro etib baholangan.
