Эден Азар нега «ПСЖ» таклифини рад этганини айтди
«Лилл», «Челси», «Реал Мадрид» ҳамда Бельгия терма жамоасининг собиқ юлдузи Эден Азар футболчилик фаолияти давомида «Пари Сен-Жермен» клубига ўтиши мумкин бўлгани ҳақида тўхталиб ўтди.
The Touchline нашрининг хабар беришича, «ПСЖ» ҳар йили Азар билан боғланиб, уни ўз сафида кўришга чақирарди. Бироқ футболчи Франция чемпионатида «Лилл»дан бошқа ҳеч қайси жамоада ўйнамасликка қарор қилганини таъкидлади.
Азарнинг сўзларига кўра, агар у Лига 1 га қайтишни истаганида, буни фақат «Лилл» сафида, масалан, фаолиятини якунлаш учун амалга оширган бўларди. Футболчи клубга ва шаҳар аҳолисига бўлган чексиз ҳурмати туфайли парижликларнинг таклифини рад этиб келган.
Эден Азар ўзининг бой футболчилик фаолияти давомида клублар миқёсида жами 623 та расмий учрашувда майдонга тушган. Унинг ҳисобида 167 та киритилган гол ва 153 та самарали узатма мавжуд.
