Eden Azar nima uchun «PSJ» taklifini rad etganini aytdi
«Lill», «Chelsi», «Real Madrid» hamda Belgiya terma jamoasining sobiq yulduzi Eden Azar o‘zining futbolchilik faoliyati davomida «Pari Sen-Jermen» klubiga o‘tishi mumkin bo‘lgani haqida to‘xtalib o‘tdi.
The Touchline nashrining xabar berishicha, «PSJ» har yili Azar bilan bog‘lanib, uni o‘z safiga chorlagan. Biroq futbolchi Fransiya chempionatida «Lill»dan boshqa hech qaysi jamoada o‘ynamaslikka qaror qilganini ta’kidladi.
Azarning so‘zlariga ko‘ra, agar u Liga 1 ga qaytishni istaganida, buni faqat «Lill» safiga, masalan, faoliyatini yakunlash uchun amalga oshirgan bo‘lardi. Futbolchi klubga va shahar aholisiga bo‘lgan cheksiz hurmati sababli parijliklarning taklifini rad etib kelgan.
Eden Azar o‘zining boy futbolchilik faoliyati davomida klublar miqyosida jami 623 ta rasmiy uchrashuvda maydonga tushgan. Uning hisobida 167 ta kiritilgan gol va 153 ta samarali uzatma mavjud.
