Эден Азар: «Айни дамда футболчидан кўра кўпроқ таксичиман, лекин бу нормал ҳолат»
«Челси» ва Мадриднинг «Реал» клуби собиқ футболчиси Эден Азар профессионал фаолиятини якунлаганидан кейинги ҳаёти ҳақида ўз фикрлари билан ўртоқлашди.
«Ҳаёт жуда тез ўтиб кетади, айниқса футболда. Кечагина 19 ёшда эдим, бугун эса — 35 даман. Нафақат футболдан, балки қолган барча нарсадан завқланиш керак. Оила — сенга ёрдам берадиган энг асосий кучдир.
Ҳозирги ҳаётим жуда оддий: уйда ўтираман ва рафиқам, фарзандларим ҳамда акаларим билан оддий нарсалардан завқланаман. Футбол ўйнаётганингда доимий сафарларда бўласан, аммо фаолиятингни тугатганингдан сўнг, ниҳоят улар учун стрессиз вақт топилади. Ҳозир ҳаётим анча содда. Мен беш фарзанднинг отасиман. Айни дамда футболчидан кўра кўпроқ таксичиман, лекин бу нормал ҳолат», — дея Азарнинг сўзларини келтирмоқда The Guardian.
Ўзининг футболчилик фаолияти давомида Азар клублар миқёсида 623 та ўйинда иштирок этган. Унинг ҳисобида 167 та гол ва 153 та голли узатма мавжуд.
