EЧЛ. «Арсенал» ўз майдонида «Байер»ни ишончли ҳисобда мағлуб этиб, кейинги босқичга чиқди
Томонлар ўртасидаги дастлабки баҳс дуранг билан якунланганди.
ФОТО: Getty Images
УЕФА Чемпионлар Лигасининг 1/8 финал босқичи доирасидаги Лондоннинг «Арсенал» ҳамда Германиянинг «Байер» жамоалари ўртасидаги жавоб учрашуви якунланди. Лондондаги «Эмирейтс» стадионида бўлиб ўтган баҳсда мезбонлар 2:0 ҳисобида ишончли ғалабани қўлга киритишди.
Учрашувнинг 36-дақиқасида «канонирлар» вингери Эберечи Эзе жарима майдончаси ташқарисидан бурилиб йўллаган зарбаси билан ҳисобни очди. 63-дақиқага келиб эса яримҳимоячи Деклан Райс жамоасининг иккинчи голини уриб, орадаги фарқни оширди.
Жамоалар ўртасидаги дастлабки учрашувда 1:1 ҳисобига дуранг қайд этилган эди. Икки ўйин натижасига кўра (3:1) «Арсенал» чорак финал йўлланмасини қўлга киритди. Леверкузеннинг «Байер» жамоаси эса ушбу босқичда мусобақадаги иштирокини якунлади.
Насрулло Каримов
Журналист