EЧЛ. 8 та гол урилган баҳсда «Барселона» аёллар жамоаси «Реал»ни йирик ҳисобда тор-мор этди
Аёллар ўртасидаги Чемпионлар Лигасининг чорак финал дастлабки учрашуви якунланди. «Альфредо ди Стефано» стадионида кечган баҳсда «Реал» ва «Барселона» жамоалари ўзаро тўқнаш келишди. Ушбу ўйинда каталонияликлар 6:2 ҳисобидаги йирик ғалабани қўлга киритишди.
Ўйиннинг 6-дақиқасида Ева Пайор ҳисобни очиб, меҳмонларни олдинга олиб чиқди. 13-дақиқада Эсме Бругтс «кўк-анорранглилар»нинг устунлигини иккитага оширди. 30-дақиқада Линда Кайседо мадридликларнинг жавоб голини урди. Бироқ, орадан икки дақиқа ўтиб Ирен Паредес учинчи голни киритди. 57-дақиқада Пайор дублни расмийлаштирган бўлса, 64-дақиқада Виктория Лопес ҳисобни йирик кўринишга олиб келди.
66-дақиқада Кайседо ҳам дубл қайд этишга муваффақ бўлди. Учрашув якунида, 89-дақиқада Алексийа Путеляс пенальтини аниқ амалга ошириб, якунги нуқтани қўйди.
Жамоалар ўртасидаги жавоб ўйини 2 апрел куни бўлиб ўтади. Турнирнинг финал баҳси эса 23 май куни Ослодаги «Уллевол» стадионида ўтказилиши режалаштирилган.
