“Ҳеч қачон таслим бўлма!”
Термизнинг “Сурхон” жамоаси футболчиси Жавоҳир Жўраев клуб матбуотига интервю берди.
Жавоҳир, аввало жамоанинг Термизга қайтиши ҳақида сўрамасдан иложимиз йўқ. Энди биз Сурхон Аренада ўзимизнинг маҳаллий мухлисларимиз қаршисида ўйнаймиз. Термизга қайтганингиздаги биринчи таассуротларингиз билан ўртоқлашинг.
-Ассалому алайкум, ниҳоят узоқ танаффусдан сўнг биз Сурхон Аренага қайтдик ва энди ўз мухлисларимиз билан бирга ўйнаймиз. Стадионда биринчи марта бўлганимда ҳаяжон ва фахрни бир пайтда ҳис қилдим. Чунки шундай ажойиб стадионни реконструксия қилишга жуда кўп меҳнат ва эътибор қаратилган
Сиз Сурхондаги даврингизда жамоани олдинга ундайдиган мухлисларни кўришга улгурдингиз. Сурхон қайерда бўлишидан қатъи назар, улар доим қўллаб-қувватлашади. Футболчиларга мухлислар ҳақиқатан ҳам ёрдам берадими ёки бу шунчаки стереотип?
-Ҳа, бу жамоага келиб қўшилганимдан сўнг Сурхон мухлисларининг жамоани қандай фидокорлик билан қўллаб-қувватлашларини кўриб лол қолдим. Қаерда ўйнашимиздан қатъи назар, улар доим биз билан бирга бўлиб, бизни ғалабага ундашмоқда. Уларга катта раҳмат айтаман!
Енди эса келинг, сизнинг фаолиятингизга ўтамиз, Жавоҳир. Тақдир қандай қилиб сизни футболчи бўлишингизга олиб келди? Ўзингиз болаликдан футболдан қизиққанмисиз?
-Мен туғилганимдаёқ отам: “Ўғлим футболчи бўлади”, деб ният қилган эканлар. Гўдаклик давримдаёқ менга доим футбол кўрсатганлар. Менимча, шунинг учун бўлса керак, ўзимни билдим-билмаган пайтимдан бошлаб тўп тепиб улғайдим ва 6 ёшимдан Пахтакор академиясига борганман
Сиз ўнг қанотда ўйнайсиз ва ҳужумда ҳам, ҳимояда ҳам фаол иштирок этасиз. Дастлабдан айнан шу позицияда ўйнашни хоҳлаганмисиз?
-Ҳа, мен ёшлигимдан айнан шу позицияда ўйнаб келаман. Болалигимдан Акмал Шораҳмедовнинг ўйинларини кўриб, шу позицияни танлаганман
Сизнинг шаклланишингизда катта рол ўйнаган инсон — Ўзбекистонда хизмар кўрсатган мураббийи, отангиз Дилшод Нуралиев эканлигини биламиз. У ҳақида гапириб берсангиз. Сизга берган энг эсда қоларли маслаҳати қайси бўлган?
Отам ҳар доим ўйинларимни кузатиб, менга кўплаб маслаҳатлар ва танбеҳлар бериб турадилар. Энг эсда қоларли маслаҳатларидан бири: “Ўғлим, ҳеч қачон қўлингни туширма. Ҳар доим меҳнат қилишдан тўхтама”, деган сўзлари бўлган
Сиз Сурхон сафида учинчи мавсумдан бери тўп суряпсиз ва, албатта, шу давр мобайнида кўп нарсаларга гувоҳ бўлган бўлсангиз керак. Шу вақт ичида сиз учун энг эсда қолган ўйинлар қайсилар бўлган?
-Ҳа, 3 йил давомида Сурхон билан биргамиз. Энг эсда қоладиган ўйинлардан бири ўтган йили бўлганди — Суғдиёнага 0:2 ҳисобида ютқазиб турган ҳолда, якунда 4:2 ҳисобида ғалаба қозонганмиз. Бу ажойиб ўйин бўлган, унда биз характер кўрсатдик ва ўйиннинг тақдирини ўзгартиришга муваффақ бўлдик. Бундай баҳсларда диққатни йўқотмаслик, мотивацияни сақлаб қолиш ва ўз устингдан чиқиб, энг яхши жиҳатларингни намоён этиш жуда муҳим
Сурхон Суперлигадаги ўртача ёш бўйича энг ёш жамоа ҳисобланади ва сизларда жуда аҳил жамоа шаклланган. Клубдаги муҳит учун ким жавобгар? Ким жамоанинг асосий қувноқчиси, йетакчиси ва кайфият кўтарувчиси?
-Жамоамиздаги энг қувноқ йигит бу Нодирхон. Етакчиларимиз кўп, лекин биз бир жамоа бўлиб, ҳар доим бир-биримизни олдинга йетаклаймиз
Дастлабки ўйинлар жамоа учун унчалик омадли бўлмади, лекин ташқаридан қараганда, ҳар бир ўйинга ғалаба учун майдонга тушаётганингиз сезилди. Сизнингча, Сурхон яна ғалабали йўлга қайтиши учун нима қилиш керак?
-Бу мавсумни яхши бошлай олмадик, лекин муҳим нарса — қандай бошлаганинг эмас, балки қандай давом эттириб, қандай якунлашинг. Биз кучлироқ бўлишимиз керак ва Худо хоҳласа, албатта, ғалабаларга эришамиз
Ўзбекистон миллий терма жамоаси футбол бўйича Жаҳон чемпионатига чиқишга жуда яқин турибди. Сизнингча, терма жамоанинг бу йўлдаги имкониятлари қандай?
-Ин шаа Аллоҳ, бу сафар албатта Жаҳон чемпионатига чиқамиз. "Бу бутун ўзбек футболи учун тарихий лаҳза бўлади. Бутун мамлакат сабрсизлик билан шу онни кутяпти. Умид қиламан, Ўзбекистон миллий жамоаси Жаҳон чемпионатига чиқади. Бунинг учун бизда ҳамма нарса бор: иқтидорли футболчилар, кучли мотивация ва яхши футбол. Ўйлайманки, биз мундиалга чиқамиз
Сиз ўйнайдиган позицияда тўп сураётган дунёнинг энг кучли 3 нафар футболчисини ким деб ҳисоблайсиз?
-Ашраф Ҳакими, Метти Кеш ва Жереми Фримпонг
Сурхоннинг топ-3 футболчиси?
-Йошларимиз, Комрон Юсупов, Беҳруз Каримов ва Беҳруз Шукуруллаев. Лекин, тўғриси, бизда ҳар бир футболчи ўз салоҳиятига эга
Сизнинг ҳаётий шиорингиз қандай?
-Оила — бу ҳаётдаги энг муҳим нарса
Сурхон мухлисларига тилакларингиз қандай бўлади?
-Шундай пайтларда бизни қўллаб-қувватлашсин, токи ғалабаларимизни биргаликда нишонлай оламиз
