Дзюдо. Замохшари Бекмуродов Prague European Open ғолиби, Қурбонбоевада бронза!
Чехиянинг Прага шаҳрида ўтказилаётган Европа Очиқ кубогининг биринчи кунида дзюдочиларимиз икки марта шоҳсунага кўтарилишди.
Қувонарлиси, бухоролик ёш дзюдочимиз Замохшари Бекмуродов Prague European Open 2025 чемпионига айланди. Фаолиятида илк бор -73 кг вазн тоифасида курашган 20 ёшли полвонимиз тажрибали рақибларини енгиб, нуфузли мусобақа ғолиби бўлди. Бекмуродов финал беллашувида украиналик Саид-Магомед Халидовни бир дақиқада оғритиш усули билан мағлубиятга учратди.
Терма жамоамизга бугунги ҳисобдан иккинчи медални Ирисхон Қурбонбоева келтирди. +78 кг вазндаги вакиламиз бронза медали учун кечган баҳсда поляк Кинга Волчакни иппон баҳоси эвазига таслим этди.
Ўзбекистон терма жамоаси медаллар жамғараши бўйича 1 та олтин ва 1 та бронза медали билан 35 давлат орасида 3-ўринга кўтарилиб олди.
