Дилшод Ҳайдарқулов: «Қуръадан ўпкалаб бўлмайди»
Олий лиганинг 2026/2027-мавсумига қуръа ташлаш маросимидан сўнг «Самарқанд» ПФК бош мураббийи Дилшод Ҳайдарқулов янги мавсум олдидан ўз фикрлари билан ўртоқлашди.
— Футбол оламида “қуръанинг кўзи кўр бўлади, ундан ўпкалаш керак эмас”, деган ибора бор. Ҳакиқатан ҳам шундай. Қуръа ташлаш жараёни шаффоф ўтди ва унда Олий лиганинг барча клублари вакиллари бевосита иштирок этди.
Қуръа жараёни бизга дастлабки турларданоқ кучли рақибларни рўбарў қилди. Кўп карра Ўзбекистон чемпионлари — “Олмалиқ” ва BMB ПФК жамоаларига қарши ўйинлар билан мавсумни бошлаймиз. Номдор рақибларга қарши баҳслардан кейин нафас ростлаб улгурмасимиздан, ўтган мавсум Биринчи лигада чемпион бўлиб, Олий лига йўлланмасини қўлга киритган “Сайхун”га қарши майдонга чиқамиз.
“Самарқанд” азалдан истеъдодлар ўчоғи бўлиб келган. Жамоа мамлакатимиз футзалига юзлаб иқтидорли ўйинчиларни етказиб берган. Айни пайтда ҳам олдимизга қўйилган асосий вазифалардан бири — истеъдодли ёшларни мамлакат терма жамоаларига тайёрлаб, етказиб бериш.
Шу билан бирга, Олий лигадаги мавқеимизни муносиб сақлаб қолиш ва ҳар бир рақиб учун жиддий “бош оғриғи” бўлишни мақсад қилганмиз.
Таркибимизда кўплаб ёш ўйинчилар бор. Жамоани хорижлик футзалчилар билан кучайтириш борасидаги ишлар ҳам давом этмоқда.
Ишонаманки, биз Самарқанд футзал жамоатчилигини уялтириб қўймаймиз. Мухлисларимизга муносиб ўйин ва кўтаринки кайфият улашиш учун бор кучимизни ишга соламиз», — деди Дилшод Ҳайдарқулов.
“Самарқанд” ПФК янги мавсумда муносиб натижа қайд этиш ва Олий лигада ўз сўзига эга бўлиш учун майдонга чиқади!
