Диего Симеоне Хулиан Альвареснинг хатти-ҳаракатидан ғазабда
“Атлетико Мадрид” бош мураббийи Диего Симеоне ҳужумчи Хулиан Альварес билан боғлиқ вазиятдан кескин норози. Аргентиналик футболчи очиқчасига “Барселона”га ўтиш истагини билдирган, бироқ Мадрид клуби уни Каталония жамоасига сотишни истамаётгани айтилмоқда.
Сўнгги кунларда Альварес жамоавий машғулотларни ўтказиб юборди. Клуб буни футболчининг ҳолати билан изоҳлаган бўлса-да, унинг трансфер истаги билан боғлиқ кескинлик ҳам давом этмоқда. Ла Лига шарҳловчиси Фил Китромилидеснинг айтишича, Симеоне Альвареснинг тутумидан шу қадар жаҳли чиққанки, ҳатто унга қарашни ҳам истамаётган.
Шунга қарамай, Альварес 30 август куни “Атлетико”нинг умумий машғулотларига қайтди. Клуб вакиллари футболчининг ҳолати яхши эканини ва кейинги Ла Лига учрашувида ундан фойдаланиш мумкинлигини билдирган.
Маълумот учун, Альваресга “Арсенал” ҳам жиддий қизиқиш билдирмоқда. Бироқ футболчининг ўзи ҳозирча Англияга қайтишдан кўра “Барселона” вариантини афзал кўраётгани айтилмоқда.
