Diego Simeone Xulian Alvaresning xatti-harakatidan g‘azabda
“Atletiko Madrid” bosh murabbiyi Diego Simeone hujumchi Xulian Alvares bilan bog‘liq vaziyatdan keskin norozi. Argentinalik futbolchi ochiqchasiga “Barselona”ga o‘tish istagini bildirgan, biroq Madrid klubi uni Kataloniya jamoasiga sotishni istamayapti.
So‘nggi kunlarda Alvares jamoaviy mashg‘ulotlarni o‘tkazib yubordi. Klub buni futbolchining holati bilan izohlagan bo‘lsa-da, uning transfer istagi bilan bog‘liq keskinlik ham davom etmoqda. La Liga sharhlovchisi Fil Kitromilidesning aytishicha, Simeone Alvaresning tutumidan shu qadar jahli chiqqanki, hatto unga qarashni ham istamayapti.
Shunga qaramay, Alvares 30-avgust kuni “Atletiko”ning umumiy mashg‘ulotlariga qaytdi. Klub vakillari futbolchining holati yaxshi ekanini va keyingi La Liga uchrashuvida undan foydalanish mumkinligini bildirgan.
Ma’lumot uchun, Alvaresga “Arsenal” ham jiddiy qiziqish bildirmoqda. Biroq futbolchining o‘zi hozircha Angliyaga qaytishdan ko‘ra “Barselona” variantini afzal ko‘rayotgani aytilmoqda.
