Диего Симеоне бошқарувидаги «Атлетико» ўз майдонида ўтказилган ЁЧЛ плей-офф баҳсларида ҳали мағлубиятга учрамаган

Диего Симеоне бошқарувидаги Мадриднинг «Атлетико» клуби ўз майдонида ўтказилган Чемпионлар Лигаси плей-офф баҳсларида ҳали бирор марта ҳам мағлубиятга учрамаган. Бу ҳақда Opta таҳлилий портали хабар бермоқда.

Манба берган маълумотларга кўра, «матрасчилар»нинг ушбу серияси жамоанинг ҳам эски, ҳам янги стадионларини қамраб олган:

• «Висенте Кальдерон»да: 7 та ғалаба ва 4 та дуранг.
• «Метрополитано»да: 6 та ғалаба ва 2 та дуранг.

Ушбу муваффақиятли серия кеча тун ҳам давом этди. Чемпионлар лигасининг 1/8 финал дастлабки учрашувида «Атлетико» ўз майдонида Англиянинг «Тоттенҳэм» жамоасини қабул қилиб, 5:2 ҳисобида йирик ғалабани қўлга киритди.

Симеоне шогирдлари жавоб ўйини олдидан ўзлари учун жуда қулай имконият яратиб олишди. Жавоб баҳси 18 март куни Лондонда бўлиб ўтади.

Насрулло Каримов

Журналист