Дешам: «Парагвайга қарши ўйин жуда оғир кечди»
Франция терма жамоаси бош мураббийи Дидье Дешам Парагвай устидан қозонилган ғалабадан сўнг рақибнинг ўйин услуби ҳақида ўз фикрлари билан ўртоқлашди.
«Бу осон ўйин бўлмади. Агар учрашув сўнггида яратган имкониятларимиздан бирини голга айлантирганимизда, ғалаба анча енгилроқ бўларди. Парагвайликлар барча мумкин бўлган усуллардан фойдаланишди. Бу мухлисларга ёқадиган футбол эмас, аммо биз диққатимизни йўқотмадик, бу эса осон эмас. Парагвай жисмонан жуда кучли жамоа ва ҳимояда ҳам аъло ҳаракат қилади. Бу биз учун яна бир муҳим қадам бўлди.
Жанубий Америка жамоаларига қарши ҳар доим қийин, аммо футболчиларим вазифани уддалаганидан жуда мамнунман. Биз чорак финалга чиқдик ва энди шу натижадан завқланишимиз керак», — деди Дешам ФИФА расмий сайтига.
Қайд этилишича, ўйиндан кейин қатор ОАВ Парагвай футболчиларининг ҳаракатларини ўта қўпол ва ҳаддан ташқари тажовузкор деб баҳолади.
Энди Франция терма жамоаси Жаҳон чемпионати чорак финалида Марокашга қарши майдонга тушади.
