Дэниэл Левининг «Тоттенхэм»даги улуши камайди
«Тоттенхэм»нинг собиқ раиси Дэниэл Левининг клубдаги улуши бироз камайди. Бунинг сабаби Луислар оиласининг клубга яна 100 миллион фунт стерлинг сармоя киритгани бўлди. Леви ҳам ўз улушини аввалги даражада сақлаб қолиш учун қўшимча маблағ киритиш имкониятига эга бўлган, бироқ бундан фойдаланмаган.
Леви 2025-йил сентябрида «Тоттенхэм» раиси лавозимини тарк этган бўлса-да, клубдаги катта улушини сақлаб қолган эди. Янги сармоя киритилиши вақтида унга ҳам ўз улушига мос равишда маблағ қўшиш таклиф қилинган, аммо белгиланган муддатда тўлов амалга оширилмаган. Натижада унинг улуши автоматик равишда қисқарган.
Ҳозирда Луислар оиласи «Тоттенхэм»ни назорат қилувчи ENIC компаниясидаги улушини 88,3 фоизга етказган. Аввалроқ Eight Sports компанияси Левининг улушини сотиб олиш бўйича келишувга эришганини маълум қилган эди. Бироқ «Тоттенхэм» бу келишувдан хабари йўқлигини билдирган ва ҳозиргача битим расман тасдиқланмаган.
Маълумот учун, Луислар оиласи 2022-йил майидан буён «Тоттенхэм»га жами 332,5 миллион фунт стерлинг сармоя киритган. Клуб эгалари жамоанинг спорт натижаларини яхшилаш учун қўшимча инвестицияларни давом эттиришини ҳам билдирган.
