Дембеле “Олтин тўп” учун асосий даъвогарларни маълум қилди
“Пари Сен-Жермен” ҳужумчиси Усмон Дембеле 2026 йилги “Олтин тўп” учун асосий даъвогарлар ҳақидаги фикрини билдирди. Амалдаги мукофот соҳиби ўзининг асосий учлигига Хвича Кварацхелия, Ҳарри Кейн ва Килиан Мбаппени киритди. Бу ҳақда футболчи France Football нашрига берган интервьюсида айтди.
“Менинг топ-3лигим — Кварацхелия, Ҳарри Кейн ва Килиан Мбаппе. Ўзимни эса ҳеч қачон рўйхатга киритмайман”, — деди Дембеле. Франциялик футболчи Кейннинг ўтган мавсумдаги ўйинларини алоҳида эътироф этди.
Дембеле соврин учун бошқа футболчилар ҳам курашиши мумкинлигини таъкидлади. У Майкл Олисе, Ламин Ямаль, Фабиан Руис ва Виллиан Пачони ҳам даъвогарлар қаторида санаб ўтди. Дембеле айниқса Олисени Бундеслигадаги мавсуми учун юқори баҳолади.
Маълумот учун, 2026 йилги “Олтин тўп” соҳиби 26 октябрь куни Лондонда бўлиб ўтадиган тақдирлаш маросимида аниқланади. Усмон Дембеле айни пайтда ушбу нуфузли индивидуал мукофотнинг амалдаги соҳиби ҳисобланади.
