Делап ёзда «Челси»ни тарк этиши мумкин
«Челси» ҳужумчиси Лиам Делап ёзги трансферлар ойнасида клубни тарк этиши мумкин. talkSPORT нашрининг хабар беришича, уни «Фулҳэм» ўз сафига қўшиб олишни кўриб чиқмоқда.
Манбага кўра, эҳтимолий трансфер Марку Силва кетганидан сўнг клубнинг янги бош мураббийи ким бўлишига боғлиқ.
«Фулҳэм» 2025/2026 йилги мавсум якунларига кўра 52 очко билан АПЛ турнир жадвалининг 11-поғонасида жойлашди. «Челси» ҳам 52 очко билан мавсумни 10-ўринда якунлади.
«Челси» 23 ёшли Делапни ўтган йилнинг июнь ойида «Ипсвич»дан 35 миллион еврога сотиб олганди. Ўшандан бери у 41 та ўйинда майдонга тушиб, иккита гол урди ва тўртта голли узатмани амалга оширди.
Унинг клуб билан шартномаси 2031 йилгача амал қилади. Transfermarkt портали эса унинг бозор қийматини 28 миллион еврога баҳоламоқда.
