Деклан Райс Англия терма жамоасининг Ганага қарши ўйинида сафга қайтишга тайёр
Англия терма жамоаси ярим ҳимоячиси Деклан Райс ЖЧ-2026 гуруҳ босқичи 2-туридан ўрин олган Ганага қарши баҳсда жамоасининг асосий таркибига қайтишга тайёр. Бу ҳақда BBC Sport нашри хабар тарқатди.
Манбанинг маълум қилишича, Райс Хорватияга қарши кечган ғалабали ўйинда (4:2) бел қисмидаги оғриқлардан шикоят қилган эди. Шифокорлар кўригидан сўнг, футболчи 23-июн куни бўлиб ўтадиган Англия терма жамоасининг иккинчи учрашувида майдонга тушишга тайёрлиги аниқланди.
Эслатиб ўтамиз, ўша ўйиндан сўнг «уч шерлар» бош мураббийи Томас Тухел яримҳимоячининг ҳолатидан хавотирда эканини билдирган эди: «Таваккал қилишни истамадим, умид қиламанки, жиддий ҳеч нарса йўқ. Биз бу масалага жиддий ёндашамиз».
Маълумот учун, 2026-йилги Жаҳон чемпионати 11-июндан 19-июлга қадар АҚШ, Канада ва Мексика майдонларида бўлиб ўтмоқда. Амалдаги унвон соҳиби Аргентина терма жамоаси ҳисобланади.
