Deklan Rays Angliya terma jamoasining Ganaga qarshi o‘yinida safga qaytishga tayyor
Angliya terma jamoasi yarim himoyachisi Deklan Rays JCh-2026 guruh bosqichi 2-turidan o‘rin olgan Ganaga qarshi bahsda jamoasining asosiy tarkibiga qaytishga tayyor. Bu haqda BBC Sport nashri xabar tarqatdi.
Manbaning ma’lum qilishicha, Rays Xorvatiyaga qarshi kechgan g‘alabali o‘yinda (4:2) bel qismidagi og‘riqlardan shikoyat qilgan edi. Shifokorlar ko‘rigidan so‘ng, futbolchi 23-iyun kuni bo‘lib o‘tadigan Angliya terma jamoasining ikkinchi uchrashuvida maydonga tushishga tayyorligi aniqlandi.
Eslatib o‘tamiz, o‘sha o‘yindan so‘ng «uch sherlar» bosh murabbiyi Tomas Tuxel yarimhimoyachining holatidan xavotirda ekanini bildirgan edi: «Tavakkal qilishni istamadim, umid qilamanki, jiddiy hech narsa yo‘q. Biz bu masalaga jiddiy yondashamiz».
Ma’lumot uchun, 2026-yilgi Jahon chempionati 11-iyundan 19-iyulga qadar AQSh, Kanada va Meksika maydonlarida bo‘lib o‘tmoqda. Amaldagi unvon sohibi Argentina terma jamoasi hisoblanadi.
