Де Зерби «Тоттенхэм» билан келишувга эришди — манба
Италиялик мутахассис Роберто Де Зерби Лондоннинг «Тоттенхэм» клуби бош мураббийи лавозимига тайинланиши бўйича келишувга эришилди. Бу ҳақда журналист Бен Жейкобс хабар бермоқда.
Маълум қилинишига, мутахассис билан беш йиллик шартнома имзоланиши кутилмоқда.
Италиялик мураббий аввалроқ Англия Премьер-лигасида «Брайтон» жамоасини бошқарган тажрибага эга. Де Зербининг сўнгги иш жойи Франциянинг «Марсель» клуби бўлиб, у жамоани 2026 йилнинг феврал ойида тарк этган эди. Шунингдек, у ўз фаолияти давомида «Шахтёр», «Сассуоло», «Беневенто» ва «Палермо» каби жамоаларда ҳам ишлаган.
Эслатиб ўтамиз, 29 март куни «Тоттенхэм» жорий йилнинг 14 февралида тайинланган мураббий Игор Тудорни истеъфога чиқарган эди. Тудор 2025/2026 йилги мавсум давомида жамоани бошқарган учинчи мутахассисга айланди. Аввалроқ клуб даниялик Томас Франк ва австралиялик Ангелос Постекоглу билан ҳам хайрлашган эди.
