Дания миллий жамоасининг собиқ бош мураббийи мия саратонга чалинди
Собиқ Дания миллий жамоаси бош мураббийи, норвегиялик Оге Харейде бош мия саратонга чалинди. Бу ҳақда NRK нашри хабар бермоқда.
Харейде олти ҳафталик нур терапияси курсини тамомлаган. Ҳозир у кимётерaпия қабул қилмоқда ва дори-дармонлар билан даволанишни давом эттирмоқда.
Футболчилик фаолиятида у Норвегия клублари «Ҳйодд» ва «Молде», шунингдек, Англиянинг «Норвич Сити» ва «Манчестер Сити» жамоаларида ўйнаган. Мураббий сифатида эса фаолиятини 1985 йилда «Молде»дан бошлаган ва ушбу клуб билан 1994 йилда Норвегия Кубогини қўлга киритган.
Кейинчалик у Швециянинг «Хельсингборг» ва «Мальмё», Норвегиянинг «Русенборг» ва «Викинг», шунингдек, Даниянинг «Брондбю» клубларини бошқарган. Турли йилларда Норвегия, Дания ва Исландия миллий жамоаларини бошқарган; Исландия унинг сўнгги иш жойи бўлган.
Оге Харейде мураббийлик фаолиятини 2024 йилда якунлаган.
