Чуквуэмека ЖЧ-2026да иштирок этиш учун Австрия фуқаролигини олиши мумкин
Дортмунднинг «Боруссия» клуби ярим ҳимоячиси Карни Чуквуэмека 2026 йилги Жаҳон чемпионатида иштирок этиш учун Австрия фуқаролигини қабул қилиши мумкин. The Athletic нашрининг хабар беришича, 22 ёшли футболчи айнан шу йўл билан халқаро майдондаги фаолиятини давом эттириш вариантини кўриб чиқмоқда.
Чуквуэмека муқаддам Англиянинг турли ёшдаги ёшлар терма жамоаларида тўп сурган бўлса-да, мамлакатнинг асосий жамоаси сафида ҳали бирорта ҳам ўйин ўтказмаган. Бу ҳолат унга спорт фуқаролигини ўзгартириш имконини беради. Маълумот учун, Карни Австриянинг Айзенштадт шаҳрида Нигериялик муҳожирлар оиласида дунёга келган, бу эса унга ушбу мамлакат терма жамоасида ўйнаш ҳуқуқини беради.
Германия Бундеслигасининг жорий мавсумида яримҳимоячи «Боруссия» таркибида 18 та учрашувда майдонга тушиб, ўз ҳисобига иккита гол ёздириб қўйди. Футболчининг Дортмунд клуби билан шартномаси 2030 йилнинг ёзигача амал қилади. Ҳозирги вақтда унинг трансфер қиймати 25 миллион евро деб баҳоланмоқда.
