«Челси» ва «Тоттенхэм» Фисник Аслани учун курашга киришди
Лондоннинг «Челси» ва «Тоттенхэм» клублари «Хоффенхайм» ҳужумчиси Фисник Аслаини жиддий қизиқиш билан кузатмоқда. Bild нашрининг хабар беришича, ҳар икки клуб 23 ёшли форвардни келаётган ёзги трансфер ойнасида ўз сафига қўшиб олиш имкониятини кўриб чиқмоқда.
Манбага кўра, бу курашда Лондон клубларига Мюнхеннинг «Бавария» жамоаси рақобатчилик қилиши мумкин. Аввалроқ ОАВда Асланига «Барселона» томонидан ҳам қизиқиш борлиги ҳақида хабарлар тарқалган эди.
Жорий мавсумда ҳужумчи барча мусобақаларда 27 та учрашувда майдонга тушиб, 9 та гол ва 8 та самарали узатмани ўз ҳисобига ёздириб қўйди. Футболчининг клуб билан амалдаги шартномаси 2029 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 30 миллион еврони ташкил этади.
