“Челси” ва “Манчестер Юнайтед” 80 миллион евролик ҳимоячига қизиқмоқда
“Бенфика” ҳимоячиси Томас Араухо Англия Премьер-лигасининг бир қатор клублари эътиборига тушган. TEAMtalk маълумотига кўра, “Челси” ва “Манчестер Юнайтед” 24 ёшли Португалия терма жамоаси футболчисини мунтазам кузатиб бормоқда.
Манбага кўра, ҳар икки клуб вакиллари “Бенфика”нинг сентябрь ойида “Милан”га қарши ўтказган учрашувини стадиондан кузатган. Араухо ўша баҳсда юқори савияда ўйин намойиш этиб, инглиз клубларининг қизиқишини янада оширган. Шунингдек, “Тоттенҳэм”, “Ньюкасл” ва “Брайтон” ҳам футболчининг ҳолатини кузатмоқда.
Бироқ Араухонинг қишки трансфер ойнасида жамоасини алмаштириши эҳтимоли паст баҳоланмоқда. Ҳимоячи сентябрь ойида “Бенфика” билан шартномасини 2031 йилгача узайтирди. Янги келишувда унинг товон пули 80 миллион евро этиб белгиланган ва Португалия клуби январь ойида бундан паст таклифларни кўриб чиқмоқчи эмас.
Маълумот учун, Томас Араухо “Бенфика” тизимида 2016 йилдан буён тўп тепиб келмоқда ва ҳозирда асосий жамоа сардорларидан бири ҳисобланади. Шартнома узайтирилган пайтда у клубнинг асосий жамоаси сафида 113 та расмий учрашув ўтказиб улгурган эди.
