«Челси» собиқ футболчиси наркотик моддалар савдосида гумонланиб қўлга олинди
«Вест Бромвич» ва «Челси» клубларининг собиқ ҳимоячиси Нил Клемент Испанияда наркотик моддаларни сотиб олиш ва сақлашда гумонланиб ҳибсга олинди. Бу ҳақда Daily Mail нашри хабар бермоқда.
47 ёшли собиқ футболчи Марбеля ва Фуэнхирола шаҳарлари оралиғидаги Ривьера дел Сол савдо марказида қўлга олинган. Тинтув давомида унинг ёнидан ва яшаш жойидан турли турдаги тақиқланган моддалар ҳамда нақд пул маблағлари топилган.
Полиция маълумотларига кўра, операция давомида бир килограммдан ортиқ наркотик моддалар мусодара қилинган. Мазкур тадбир маҳаллий аҳолининг шубҳали ҳаракатлар борасидаги шикоятларидан сўнг амалга оширилган текширувнинг бир қисмидир.
Маълумот ўрнида, Нил Клемент 2000 йилдан 2010 йилга қадар «Вест Бромвич» шарафини ҳимоя қилган бўлиб, жамоа сафида 295 та ўйинда майдонга тушган ва 24 та гол муаллифига айланган. Фаолиятининг аввалида у «Челси» клуби аъзоси ҳам ҳисобланган. Ҳозирда суд қарори билан у тергов якунига қадар гаров эвазига озодликка қўйиб юборилган.
