«Челси» сўнгги олтита ўйиннинг бештасида мағлубиятга учради
«Челси» Англия Премьер-лигасининг 32-турида «Манчестер Сити»га 0:3 ҳисобида имкониятни бой берди. Шу тариқа, «кўклар» барча мусобақалардаги сўнгги олтита ўйиннинг бештасида мағлубиятга учрашди.
Лондонликларнинг ушбу муваффақиятсиз серияси УЕФА Чемпионлар Лигаси 1/8 финали доирасидаги «ПСЖ»га қарши баҳсда (2:5) бошланган эди. Шу пайтдан кейин, Лиам Розеньор шогирдлари АПЛда «Ньюкасл»га (0:1), парижликлар билан жавоб баҳсида эса яна мағлуб бўлишди (0:3). Худди шундай ҳисоб билан «Челси» Англия чемпионатида «Эвертон»га ҳам ютқазди. Англия Кубогида «Порт Вейл»ни тор-мор этиш (7:0) статистикани бироз яхшилаган бўлса-да, ортидан «шаҳарликлар»дан қабул қилинган мағлубият вазиятни яна оғирлаштирди.
Ҳозирги вақтда «Челси» 48 очко билан АПЛ турнир жадвалида олтинчи поғонани эгаллаб турибди. Жамоани 18 апрель куни 33-тур доирасида «Манчестер Юнайтед»га қарши муҳим учрашув кутмоқда.
