«Челси» скаутлари Марказий Осиё бозорига йўналди
Лондоннинг «Челси» клуби янги раҳбарият келганидан сўнг трансфер сиёсатида катта ўзгаришлар қилди. Энди клубнинг асосий эътибори тайёр юлдузлардан кўра, дунё бўйлаб ёш ва иқтидорли футболчиларни излаб, уларни тарбиялашга қаратилмоқда.
Шу мақсадда «Челси» ўз скаутлар тармоғини кенгайтириб, Марказий Осиё мамлакатларида ҳам фаолият бошлади. Энди клуб селекционерлари Қозоғистон, Ўзбекистон, Қирғизистон, Туркманистон ва Тожикистон каби илгари етарлича эътибор қаратилмаган ҳудудларда ҳам ёш талантларни излайди.
Ўзбекистон футболчилари учун бу янгилик катта имконият ҳисобланади. Улар майдондаги чиқишлари ва ўсиш суръатлари билан Европа скаутлари диққат марказида бўлишлари мумкин. Дунёнинг етакчи клубларидан бири томонидан кузатилиши эса ёшлар учун энг нуфузли академияларга йўл очиши мумкин.
