«Челси» Розеньер кетганидан сўнг сўнгги икки ўйинда бир очко тўплади
Англия Премьер-лигасининг 36-турида «Челси» жамоаси «Ливерпул» билан дуранг (1:1) ўйнади. Шу тариқа, Лондон клуби бош мураббий Лиам Розеньер истеъфога чиқарилганидан кейин АПЛнинг икки турида бор-йўғи бир очко жамғара олди.
«Кўклар» 22 апрель куни Розеньернинг истеъфосини эълон қилган эди. Мутахассис кетганидан сўнг жамоани вақтинча Калум Макфарлейн бошқармоқда. Унинг қўл остида «Челси» Англия кубоги ярим финалида «Лидс»ни мағлуб этди (1:0), бироқ Премьер-лигада «Ноттингем Форест»га (1:3) имкониятни бой берди.
Англия чемпионатининг 36 та ўйинидан сўнг мерсисайдликлар 59 очко билан тўртинчи ўринни эгаллаб турибди. 49 очко тўплаган «кўклар» эса 9-поғонадан жой олган. Олдинда «Челси»ни муҳим баҳс кутмоқда: 16 май куни жамоа Англия кубоги финалида «Манчестер Сити» билан куч синашади.
