«Челси» Энцо Фернандес ўрнига уч нафар номзодини кўриб чиқмоқда
Аргентиналик футболчи ёзда жамоасини ўзгартириши мумкин.
ФОТО: Getty Images
Лондоннинг «Челси» клуби ёзги трансфер ойнаси арафасида яримҳимоячи Энцо Фернандеснинг ўрнини эгаллаши мумкин бўлган номзодларни ўрганишга киришди. Caught Offside нашри хабар беришича, айни пайтда «кўклар» раҳбарияти уч нафар футболчи номзодини кўриб чиқмоқда.
- Эллиот Андерсон («Ноттингем Форест»): Лондон клуби ушбу футболчига жиддий қизиқиш билдирмоқда. Бироқ, «Ноттингем Форест» ўз яримҳимоячисини 100 миллион фунт стерлинг (тахминан 116 миллион евро) миқдорида баҳолаётгани сабабли, мазкур трансфернинг амалга ошиши мураккаб кечиши кутилаётгани айтилмоқда.
- Кес Смит («АЗ Алкмар»): Нидерландиянинг «АЗ Алкмар» клубида тўп суриб келаётган 20 ёшли иқтидорли яримҳимоячи ҳам «Челси» скаутлари эътиборига тушган.
- Матеус Мане («Вулверхэмптон»): Рўйхатдаги энг ёш номзод бўлиб, «бўрилар»нинг 18 ёшли аъзоси истиқболли футболчи сифатида баҳоланмоқда.
Қайд этилишича, «Челси» раҳбарияти Энцо Фернандесни зудлик билан сотиш ниятида эмас. Шундай бўлса-да, клуб келажакда воқеалар ривожи унинг жамоани тарк этиши билан якунланиши эҳтимолига қарши стратегик тайёргарлик кўрмоқда.
Насрулло Каримов
Журналист