«Челси» бугун Марескани ишдан бўшатиши мумкин — манба
Лондоннинг «Челси» клуби бош мураббий Энцо Мареска билан хайрлашиш арафасида турибди. Бу ҳақда The Guardian нашри журналисти Алекс Крук хабар бермоқда.
Манбага кўра, мураббий бугун — 1 январь куни лавозимидан озод этилиши мумкин.
Қайд этилишича, Маресканинг клуб раҳбарияти билан муносабатлари бутунлай ёмонлашиб кетган. Бунда жамоанинг сўнгги натижалари муҳим роль ўйнаган: «Челси» охирги 9 ўйинда атиги 2 марта ғалаба қозонган.
«Борнмут»га қарши кечган учрашувдан (2:2) сўнг Мареска матбуот анжуманида иштирок этмади. Расмий сабаб сифатида касаллик кўрсатилган бўлса-да, аслида мураббий клуб ичидаги вазиятдан норози бўлгани учун журналистлар олдига чиқишни истамаган.
Англия Премьер-лигасининг 19 туридан сўнг «Челси» 30 очко билан турнир жадвалида бешинчи ўринда бормоқда. Лондонликлар пешқадам «Арсенал»дан 15 очкога орқада қолмоқда.
