«Челси» Антонио Контени жамоага қайтариш имкониятларини кўриб чиқмоқда
«Челси» клуби 2016 йилдан 2018 йилгача жамоани бошқарган ва 2017 йили Англия чемпионлигини қўлга киритган италиялик мутахассис Антонио Контени ортга қайтариш имкониятини кўриб чиқмоқда. Бу ҳақда Calciomercato нашри хабар бермоқда.
Манбанинг маълумотларига кўра, Контенинг хизматларига Италия футбол федерацияси (FIGC) ҳам қизиқиш билдирмоқда, бироқ «Челси» унга расмий таклиф билан чиқиш борасида қатъий қарорга келган.
56 ёшли мутахассис 2024 йилнинг ёзидан буён «Наполи» бош мураббийи лавозимида ишлаб келмоқда ва унинг қўл остида неаполликлар ўтган мавсумда Серия А ғолибига айланишди.
Контенинг клуб билан амалдаги шартномаси 2027 йилнинг ёзига қадар мўлжалланган. Италия чемпионатининг 33 та туридан сўнг «Наполи» 66 очко жамғарган ҳолда турнир жадвалида учинчи ўринни эгаллаб турибди.
