Чеферин: «ИФА жанжалидан кейин футболга бўлган ишонч тиклангани йўқ»
УЕФА президенти Александр Чеферин ИФАнинг хусусий инвесторларни жалб қилиш бўйича баҳсли лойиҳаси бекор қилинганига қарамай, жаҳон футболига бўлган ишонч ҳали тикланмаганини айтди. У бу фикрларни 23 сентябрь куни Portugal Football Summit анжуманига йўллаган видеомурожаатида билдирди.
Чефериннинг таъкидлашича, футболга бўлган ишонч бирлик, шаффофлик ва барча манфаатдор томонларга хизмат қиладиган бошқарувга таянади. УЕФА раҳбари сўнгги воқеаларда ушбу тамойилларга путур етганини билдириб, баҳсли лойиҳа бекор қилинган бўлса-да, унинг оқибатларини бартараф этиш учун ҳали кўп иш қилиш кераклигини таъкидлади.
Гап ИФА президенти Жанни Инфантино илгари сурган FIFA Forward Enterprise лойиҳаси ҳақида кетмоқда. Ушбу ташаббус ИФАнинг тижорий ҳуқуқлари, жумладан Жаҳон чемпионатига алоқадор активларнинг 20 фоизигача бўлган улушини ташқи инвесторларга таклиф қилишни назарда тутган. УЕФА, ОФК ва КОНКАКАФ каби конфедерацияларнинг кескин қаршилигидан сўнг лойиҳа бекор қилинди. Кейинчалик Инфантино ИФАнинг йирик қарорларни қабул қилиш тизими бўйича мустақил ташқи текширув ўтказишга тайёрлигини маълум қилди.
Маълумот учун, Чеферин ва КОНКАКАФ президенти Виктор Монтальяни ИФА молиявий захираларини мустақил текширувдан ўтказиш ҳамда 2027–2030 йилларда ташкилотнинг 211 аъзо ассоциациясининг ҳар бирига камида 10 миллион доллардан қўшимча маблағ ажратишни таклиф қилган. Уларнинг ҳисоб-китобига кўра, ИФАнинг жорий цикл якунидаги захиралари қарийб 6 миллиард долларга етиши мумкин.
