«Бунёдкор» клуби ҳужумчиси энг истиқболли 60 нафар футболчи рўйхатидан жой олди
Англиянинг нуфузли The Guardian нашри 2008 йилда туғилган энг истиқболли 60 нафар футболчи рўйхатини эълон қилди. Унда Марказий Осиёдан уч нафар ўйинчи ҳам ўрин олди.
Жумладан, Тошкентнинг «Бунёдкор» клуби форварди Садриддин Ҳасанов, Қозоғистоннинг «Қайрат» клуби ҳужумчиси Дастан Сатпаев ва Тбилисининг «Динамо» жамоаси ҳимоячиси Саба Харебашвили ушбу рўйхатга киритилди.
Шунингдек, рўйхатда «Барселона» вакиллари — вингер Тони Фернандес ва яримҳимоячи Нико Гийен, «Боруссия Д» ҳужумчиси Самуэль Инасио, «Бавария»нинг иқтидорли яримҳимоячиси Карл Леннарт ҳамда «ПСЖ» форварди Иброҳим Мбайе каби ёш юлдузлар ҳам жой олган.
Қизиғи шундаки, Мбайе жорий мавсум парижликлар сафида аллақачон 9 та ўйинда майдонга тушди ва «Барселона»га қарши ЯЧЛ 2-тур учрашувида (2:1) асосий таркибдан жой олди.
