Бундеслига. «Бавария» ўз майдонида «Штутгарт»ни мағлуб этиб, муддатидан аввал Германия чемпионлигини қўлга киритди
Германия Бундеслигасининг 30-тури доирасида «Бавария» ва «Штутгарт» жамоалари ўртасидаги учрашув якунланди. «Арена Мюнхен» стадионида бўлиб ўтган баҳсда мезбонлар 4:2 ҳисобида ғалаба қозонди.
Учрашувнинг 21-дақиқасида Крис Фюрич меҳмонларни ҳисобда олдинга олиб чиқди. 31-дақиқада Рафаэл Геррейру мувозанатни тиклаган бўлса, 33-дақиқада Николас Жексон мюнхенликларнинг иккинчи голини урди. 37-дақиқада Альфонсо Дэвис фарқни оширди, 52-дақиқада эса Харри Кейн ҳисобни 4:1 кўринишига келтирди. Ўйин якунланиши арафасида, 88-дақиқада Чема Андрес меҳмонларнинг иккинчи голига муаллифлик қилди.
Ушбу ғалабадан сўнг «Бавария» муддатидан аввал Германия чемпионлигини қўлга киритди. 79 очко тўплаган жамоа турнир жадвалида пешқадамлик қилмоқда, «Штутгарт» эса 56 очко билан тўртинчи ўринда бормоқда. Бу «Бавария» учун ўз тарихидаги 35-чемпионлик бўлди.
Навбатдаги турда, 25 апрель куни «Бавария» сафарда «Майнц» билан куч синашса, «шваблар» 26 апрель куни ўз майдонларида «Вердер»ни қабул қиладилар.
