Бугун ҳаммасини ҳал қиламиз: Машариповнинг тарихий ўйин олдидаги илҳомлантирувчи нутқи
Ўзбекистон футбол ассоциацияси Жаҳон чемпионати саралаш босқичида БААга қарши ўйиндан олдин терма жамоа кийиниш хонасида суратга олинган видеони эълон қилди. Унда жароҳат олганига қарамай жамоа билан бирга бўлган Жалолиддин Машариповнинг мотивацион нутқи акс этган — бу сўзлар футболчилар учун жуда катта маънавий қўллаб-қувватлов бўлган.
«Шу пайтгача ҳаммамиз айтдик: Ватан учун, ота-она, халқ, Ўзбекистон учун деб. Буларнинг ҳаммаси айтилган. Энди эса — нуқта қўядиган ўйин», — деди Машарипов. У жамоадаги бирдамлик ва дўстона муҳитга урғу берди:
«3-4 йилдан бери биз бир-биримизни оиламиздагилардан ҳам кўп кўряпмиз. Демак, бу жамоа — бизнинг иккинчи оиламиз. Келинглар, бугун ҳам шуни исботлайлик. Ўзбекистонда миллионлаб одамлар бизни кутяпти. Ушбу 90 дақиқадан сўнг бошимиз эгилиб ўтирмаслигимиз керак. Бу кун юртимиз учун байрамга айлансин».Машарипов БАА термасида кўплаб табиийлаштирилган легионерлар борлигини ҳам эслаб ўтди, аммо рақибнинг исми ва келиб чиқишига қараб ҳайиқмасликка чақиради:
«Битта ўйин қолди — Қатарга қарши ўйин бизга керак эмас. Бугун ҳаммасини ҳал қиламиз. Агар бирдам бўлсак, улардан ҳеч бири биздан кучли эмас. Хоҳласа, Бразилиядан ёки Португалиядан футболчи олиб келишсин — фарқи йўқ. Бугунги кун бизники, ким туришидан қатъи назар, натижани биз ҳал қилишимиз керак».Нутқининг якунида у жамоа учун дуо қилаётган бутун халқнинг қўллаб-қувватлаши ҳақида тўхталиб ўтди:
«Бугун ҳамма бизнинг ёнимизда. Бутун Ўзбекистон, ота-оналаримиз — кимдир Маккада, кимдир юртимизда — бизни дуо қиляпти. Худо хоҳласа, ҳаммаси яхши бўлади. Қўрқмаймиз, майдонда 100 фоиз ўзимизни бериб ўйнаймиз. Қолгани — Аллоҳнинг қўлида», — дея сўзини якунлади Машарипов.
