Бруну Фернандешга Европа ва Саудия Арабистони клублари қизиқиш билдирмоқда
“Манчестер Юнайтед” ярим ҳимоячиси Бруну Фернандеш фаолиятини бошқа клубда давом эттириши мумкин. 32 ёшли португалиялик футболчига Европа ва Саудия Арабистонининг бир қатор клублари қизиқиш билдирмоқда. Бу ҳақда журналист Экрем Конур ижтимоий тармоқлардаги саҳифасида маълум қилди.
Манбага кўра, Фернандешга қизиқиш билдираётган жамоалар орасида Туриннинг “Ювентус” клуби ҳам бор. Футболчининг шартномасида хориж клублари учун 65 миллион евролик товон пули мавжудлиги қайд этилган.
Фернандеш 2020 йил январидан буён “Манчестер Юнайтед” шарафини ҳимоя қилиб келмоқда. Унинг амалдаги шартномаси 2027 йил ёзигача мўлжалланган. Сўнгги ойларда португалиялик футболчининг келажаги бир неча бор муҳокама қилинган бўлса-да, у клубда қолишга тайёр эканини билдирган.
Маълумот учун, Бруну Фернандеш жорий АПЛ мавсумида 5 та учрашувда 3 та гол уриб, 1 та голли узатма амалга оширган.
