Бруну Фернандеш “Барселона”дан жавоб кутмоқда
Англиянинг “Манчестер Юнайтед” клуби ярим ҳимоячиси Бруну Фернандеш фаолиятини Испаниянинг “Барселона” жамоасида давом эттириши мумкин. Португалиялик футболчи каталонияликлар томонидан эҳтимолий трансфер юзасидан қарор қабул қилинишини кутмоқда. Бу ҳақда журналист Экрем Конур хабар бермоқда.
Манбага кўра, “Барселона” ҳозирча Фернандешни ўз сафига қўшиб олиш борасида якуний қарорга келмаган. Шунингдек, каталонияликлар ва “Манчестер Юнайтед” ўртасида футболчининг трансфери юзасидан ҳеч қандай келишувга эришилмаган. Шу сабабли португалиялик ярим ҳимоячининг келажаги ҳамон ноаниқлигича қолмоқда.
Фернандешга Европанинг бошқа клублари ҳам қизиқиш билдирмоқда. Хусусан, Италиянинг “Ювентус” ва “Милан”, Испаниянинг “Атлетико” ҳамда Туркиянинг “Галатасарой” жамоалари футболчи атрофидаги вазиятни диққат билан кузатиб бормоқда. Улар “Барселона” билан музокаралар қандай якунланишига қараб, трансфер учун курашга қўшилиши мумкин.
Маълумот учун, 32 ёшли Бруну Фернандеш 2020 йил январь ойидан буён “Манчестер Юнайтед” шарафини ҳимоя қилиб келмоқда. Унинг инглиз клуби билан амалдаги шартномаси 2027 йилнинг 30 июнигача мўлжалланган ва яна бир йилга узайтириш имконияти мавжуд. Transfermarkt портали португалиялик футболчининг бозор қийматини 35 миллион еврога баҳоламоқда.
