Бруну Фернандеш — Англияда йилнинг энг яхши футболчиси
«Манчестер Юнайтед» сардори Бруну Фернандеш Футбол журналистлари ассоциацияси (FWA) талқинига кўра Англияда йилнинг энг яхши футболчиси деб топилди ва бу билан «қизил иблислар» тарихида янги саҳифа очди. Португалиялик ярим ҳимоячи жорий мавсумда барча мусобақаларда 34 та ўйинда майдонга тушиб, 8 та гол ва нақ 20 та голли узатмани ўз ҳисобига ёздириб қўйди.
Қайд этиш жоизки, Фернандеш 2010 йилда афсонавий Уэйн Руни ушбу совринга лойиқ кўрилганидан буён FWA мукофотини қўлга киритган илк «Юнайтед» футболчисига айланди.
Ўтган мавсум якунида спортчининг «Олд Траффорд»даги келажаги сўроқ остида қолган, клуб раҳбарияти ҳатто унга Саудия Арабистонининг «Ал-Ҳилол» клубидан тушган фантастик молиявий таклифни қабул қилишга рухсат берган эди.
Бироқ 31 ёшли футболчи пуллардан кўра Манчестердаги лойиҳани афзал билди ва Европанинг бошқа гранд жамоалари қизиқишини ҳам рад этиб, клубда қолди. Унинг майдондаги етакчилиги сабаб, «Юнайтед» мавсумни совринсиз якунлаётган бўлса-да, Премьер-лигада кучли учликдан жой олиб, Чемпионлар Лигаси йўлланмасини нақд қилишга жуда яқин турибди.
Таҳлилчиларнинг фикрига кўра, Бруну Фернандеш жамоа энг оғир дамларни бошидан кечираётган, хусусан, Рубен Аморим истеъфога чиқарилган қалтис паллада масъулиятни ўз зиммасига олиб, ҳақиқий сардорлик хислатларини намоён этди. Унинг 2027 йилгача мўлжалланган шартномаси мавжуд бўлса-да, Сер Жим Ретклифф бошчилигидаги янги раҳбарият жамоанинг асосий ҳаракатлантирувчи кучига янги келишув таклиф қилиши кутилмоқда.
Ҳозирда бор эътиборини миллий чемпионат ўйинларига қаратган Фернандеш ўз келажаги борасидаги якуний музокараларни фақатгина бўлажак Жаҳон чемпионатидан сўнг ўтказишини маълум қилган.
