Британияда АПЛдаги аргентиналик футболчиларнинг ишчи визаларини бекор қилиш талаби янгради
ЖЧ-2026 ярим финалидан сўнг юзага келган сиёсий можаро Буюк Британияда янги баҳсларни келтириб чиқарди. Айрим британиялик сиёсатчилар ва жамоатчилик вакиллари Англия Премьер-лигасида тўп сураётган аргентиналик футболчиларнинг ишчи визаларини бекор қилиш чақириқ билан чиқди.
Бунга Аргентина футболчилари Англия устидан қозонилган 2:1 ҳисобидаги ғалабадан сўнг "Малвина ороллари Аргентинаники" деган сиёсий баннер билан суратга тушгани сабаб бўлди. Британия томонининг фикрича, бу ҳаракат спортни сиёсатга аралаштириш бўлиб, FIFA қоидаларига зид ҳисобланади.
Шу билан бирга, визаларни бекор қилиш бўйича ҳеч қандай расмий қарор қабул қилинмаган. Ҳозирча бу фақат айрим сиёсатчилар ва жамоатчилик вакиллари томонидан илгари сурилган талаб бўлиб, Буюк Британия ҳукумати FIFAни ушбу воқеа юзасидан текширув ўтказишга чақирган.
Эслатиб ўтамиз, Аргентина футболчиларининг баннер билан тушган сурати ортидан FIFA томонидан интизомий текширув ўтказилиши кутилмоқда. Бироқ ташкилот Жаҳон чемпионати якуннига қадар Аргентина терма жамоасига нисбатан ҳеч қандай жаза қўлланмаслигини маълум қилган.
