Бразилия терма жамоаси тўп назорати бўйича ўзининг антирекордини янгилади
Бразилия миллий терма жамоаси Жаҳон чемпионатлари тарихида тўп назорати бўйича ўзининг энг ёмон кўрсаткичини қайд этди. Норвегияга қарши кечган баҳсда бу кўрсаткич атиги 34 фоизни ташкил қилди. Бу ҳақда Opta Sport таҳлилий канали хабар бермоқда.
Бунгача "пентакампеонлар"нинг энг паст кўрсаткичи 40 фоизга тенг бўлиб, ушбу натижа ЖЧ-1998 доирасидаги Нидерландия терма жамоасига қарши учрашувда муҳрланган эди.
Эслатиб ўтамиз, ЖЧ-2026 нимчорак финалидан ўрин олган мазкур баҳсда Бразилия терма жамоаси Норвегияга 1:2 ҳисобида имкониятни бой берди. Ғолиблар сафида Эрлинг Холанд дубл қайд этган бўлса, бразилияликларнинг ягона жавоб голига пенальтини аниқ амалга оширган Неймар муаллифлик қилди.
Мундиалнинг чорак финал босқичида Норвегия терма жамоаси Мексика – Англия жуфтлиги ғолиби билан ярим финал йўлланмаси учун кураш олиб боради.
Амалдаги жаҳон чемпиони Аргентина терма жамоаси ҳисобланади. Улар 2022-йили Қатарда ўтган турнир финалида Франция терма жамоасини мағлуб этган ҳолда бош совринни қўлга киритишган эди.