Брахим Диас яна \"Милан\"га қайтиши мумкин
Мадриднинг "Реал" клуби яримҳимоячиси Брахим Диас яна "Милан" сафида фаолиятини давом эттириши мумкин. Хабарларга кўра, Италия гранди ижодкор футболчини ортга қайтариш имкониятини кўриб чиқмоқда.
Маълумотларга қараганда, "Милан" ҳужумкор яримҳимоячи позициясини кучайтиришни режалаштирмоқда ва Брахим бу рўйхатдаги асосий номзодлардан бири ҳисобланади. Бироқ "Реал Мадрид" футболчини қўйиб юборишга шошилмаяпти ва эҳтимолий трансфер учун камида 60 миллион евро талаб қилиши мумкин. "Милан" эса бу суммани юқори деб ҳисобламоқда.
Брахим Диас 2020–2023 йиллар оралиғида "Милан" сафида ижара асосида тўп суриб, мухлислар меҳрини қозонган эди. Шундан сўнг у "Реал Мадрид"га қайтиб, жамоа билан янги шартнома имзолади.
Ҳозирча томонлар ўртасида расмий музокаралар бошланганига оид тасдиқланган маълумот йўқ. Шу сабабли трансфер эҳтимоли ҳозирча миш-мишлар даражасида қолмоқда.
