Босқичма-босқич яхши жамоа шакллантиряпмиз, тўғри йўналишдамиз - Каннаваро
Ўзбекистон миллий жамоаси бош мураббийи Фабио Каннаваро Сурияга (4:1) қарши ўйиндан сўнг жамоанинг бугунги ҳолати, янги тактик схема, прессинг ва Осиё кубогидаги эҳтимолий рақиблар ҳақида фикр билдирди.
– Биз ушбу ўйинга яхши ёндашув ва юқори кайфият билан етиб келдик. Барча футболчилар биргаликда, аҳил жамоа бўлиб ишламоқда. Ўйиндан олдин йигитларга «ўртоқлик ўйини» деган тушунча йўқлигини, ҳар бир ўйинга жиддий ёндашиш кераклигини таъкидладим. Улардан юқори темпда ва интенсив ўйнашни сўрадим. Биз ҳали кўп жиҳатларда ривожланишимиз керак. Аммо босқичма-босқич яхши жамоа шакллантириб боряпмиз.
– Энди Жанубий Кореяга (6 октябрда) қарши қийин сафар ўйини турибди. Барча футболчиларнинг ҳолати яхши ва биз тўғри йўналишда ҳаракат қилишимиз керак.
– Мен барча футболчиларнинг бир хил темпда шуғулланишини хоҳлайман ва ҳаммага бирдек қарайман. Менда «асосий таркиб» ёки «захира футболчиси» деган тушунча йўқ. Бугун баъзи футболчиларни алмаштириш ва бошқаларга ҳам ўзини кўрсатиш имкониятини бериш муҳим эди.
– Одамлар ўйин осон кечди деб ўйлаши мумкин. Аммо биз тўғри бошлаганимиз, кўп югурганимиз ва тўғри прессинг қилганимиз сабабли ўйинни ўзимиз учун осонлаштирдик. Сурия осон рақиб эмас. Биз уларнинг Иорданияга қарши ўйинини кузатдик, ўша баҳс 1:1 ҳисобида якунланган эди. Шунинг учун бу ўйинга ҳам жиддий тайёрландик.
– Мен учун натижадан кўра, жамоанинг характери ва жамоавий ўйин кўрсатиши муҳимроқ. Эронга қарши баҳсда ҳам буни кўрсатдик. Улар Осиёдаги энг кучли жамоалардан бири.
– Албатта, доим ҳам мукаммал ўйнаб бўлмайди. Биз машғулотларда барча жиҳатлар — ҳимоядан тўп билан чиқишдан тортиб стандарт вазиятларгача ишлаяпмиз. Асосий эътибор қаратишимиз керак бўлган жиҳатлардан бири — босим ўтказиш учун қулай вақтни ҳис қилиш.
– Жаҳон чемпионатида топ жамоаларга қарши ўйнаб, бундай баҳсларда интенсив ва агрессив бўлиш қанчалик муҳимлигини кўрдик. Кучли жамоага қарши ноқулай вақтда прессинг қилсангиз, рақиб бу вазиятдан осон чиқиб кетади. Шунинг учун футболчиларга қачон олдинга чиқиб босим ўтказиш кераклигини ўргатяпмиз.
– Футбол — вақт ва ҳудуд ўйини. Тўп рақибда бўлса, унга ўйлаш учун вақт қолдирмаслик мақсадида ҳудудни торайтиришимиз керак. Тўп бизда бўлганда эса, аксинча, кўпроқ вақтга эга бўлиш учун бўш ҳудудларни кенгайтиришимиз лозим. Агар тўғри вақтда прессинг қилмасангиз, ҳатто кучсиз жамоага қарши ҳам муаммога дуч келишингиз мумкин. Сўнгги кунларда футболчилар биз улардан нимани талаб қилаётганимизни яхши тушуниб олишганидан хурсандман.
– Жамоам кўрсатаётган ўйиндан мамнунман. Қисқа вақт ичида футболчилар янги тизим ва ғояларимизни яхши тушуниб олишди. Ўйлайманки, улар ҳозирги футболдан кўпроқ завқ олишяпти, чунки тўп назорати асосан бизда бўляпти.
– Осиё кубогидаги эҳтимолий рақиблар ҳақида ҳозирдан гапириш эрта. Финалгача етиб бориш учун тўғри йўлни топишимиз керак, аммо ҳозирдан фақат Японияни ўйлаб, бошқа жамоаларга эътиборни йўқотмаслигимиз шарт.
– Биз барча рақибларга қарши ўйнашга тайёр бўлишимиз керак. Мен Япония футболини яхши биламан. «Гуанчжоу Эвергранд» билан Осиё Чемпионлар лигасида япон жамоаларига қарши ўйнаганмиз ва уларнинг қандай футбол кўрсатишидан хабарим бор.
