Бизга мукофотлар керак, пенсиядаги ўйинчилар эмас: «Интер Майами» мухлислари Мессини танқид қилишди
«Интер Майами» мухлислари жамоанинг КОНКАКАФ Чемпионлар Лигасидан чиқиб кетганидан сўнг Лионел Мессини қаттиқ танқид остига олишди. АҚШ клуби ярим финалда Канаданинг «Ванкувер» жамоасига икки ўйин натижасига кўра ютқазиб, мусобақани тарк этди.
Мағлубиятдан сўнг ижтимоий тармоқларда футболчилар, жумладан, 37 ёшли аргентиналик ҳужумчига нисбатан салбий фикрлар тарқалди. Кўпчилик мухлислар жамоада юлдузли ветеранлар иштирокидаги модел ривожланишга тўсқинлик қилаётганини таъкидлашди.
— Мен Мессининг кетишини истайман. Лео жамоа тараққиётини секинлаштирмоқда. Ўзига бошқа клуб топсин. Бизга совринлар керак, пенсиядаги ўйинчилар эмас, — деб ёзди ThePessiLad тахаллусли фойдаланувчи.
— Бу йиғлак Мессини ва қария Суаресни йўқотайлик, — деб қўшимча қилди Laisser Maeda.
— Мессининг кетиши ҳақида баёнот кутаяпмиз, — деб ёзди Kody Cicale.
Лионел Месси 2023 йил ёзида «Интер Майами»га ўтган эди. Унинг шартномаси 2025 йил охиригача амал қилади. Қатор ёрқин ўйинларига қарамай, жамоанинг ноаниқ натижалари ва мухлислар босими ортиб бораётган бир пайтда аргентиналик юлдузга бўлган танқидлар ҳам кучаймоқда.
